The Bible


Ta olk ayn ta mee er vakin fo'n ghrian, as cadjin mastey deiney.

There is an evil which I have seen under the sun, and it is common among men:


Dooinney ta Jee er choyrt da berchys, as cooid, as ooashley, myr shen nagh vel eh feme nhee erbee jeh slane yeearree e annym; ny-yeih cha vel y gioot echey veih Jee dy yannoo ymmyd jeh; agh ta joarree goaill y soylley jeh: ta shoh neesht fardail, as doghan treih.

A man to whom God hath given riches, wealth, and honour, so that he wanteth nothing for his soul of all that he desireth, yet God giveth him not power to eat thereof, but a stranger eateth it: this is vanity, and it is an evil disease.


Ga dy jinnagh dooinney keead lhiannoo y gheddyn, as e vea dy ve beayn son ymmodee bleeantyn, as ga dy darragh eh gys eash as ooashley yn chanstyr; ny-yeih mannagh vel yn annym echey jeant-magh lesh foays e laboraght, as nagh vel wheesh boayl-oanluckee echey; ta mee gra, dy vel lhiannoo ruggit roish e hraa ny share na eh.

If a man beget an hundred children, and live many years, so that the days of his years be many, and his soul be not filled with good, and also that he have no burial; I say, that an untimely birth is better than he.


Son haink eh stiagh 'sy theihll ayns fardail, as t'eh gimmeeaght ersooyl ass ayns dorraghys, as bee'n annym echey er ny yarrood ayns dorraghys.

For he cometh in with vanity, and departeth in darkness, and his name shall be covered with darkness.


Chamoo t'eh er vakin y ghrian, ny ennaghtyn echey jeh mie ny sie: ta fea smoo ec y derrey yeh na'n jeh elley.

Moreover he hath not seen the sun, nor known any thing: this hath more rest than the other.


Eer abbyr, dy beagh e vea daa housane bleïn, foast cha vel eh er ghoaill gerjagh e chooid-seihlt: nagh vel ooilley goll gys yn un voayl?

Yea, though he live a thousand years twice told, yet hath he seen no good: do not all go to one place?


Ta ooilley laboraght dooinney son e veeal, as ny-yeih cha vel e vian dy bragh jeant magh.

All the labour of man is for his mouth, and yet the appetite is not filled.


Son cre'n vondeish smoo t'ec y dooinney creeney na'n ommydan? ny cre t'ec y voght, ta gymmyrkey eh-hene dy feudagh 'sy theihll?

For what hath the wise more than the fool? what hath the poor, that knoweth to walk before the living?


Ny share ta shen ta roish dty hooillyn, na shaghrynys yn yeearree: ta shoh myrgeddin fardail, as seaghney cree.

Better is the sight of the eyes than the wandering of the desire: this is also vanity and vexation of spirit.


Shen ny ta er ve, te hannah enmyssit, as s'mie fys nagh vel eh agh dooinney: chamoo oddys eh streeu rishyn ta ny s'niartal na 'hene.

That which hath been is named already, and it is known that it is man: neither may he contend with him that is mightier than he.


Fakin dy vel ymmodee reddyn ta bishaghey fardail, cre woad share ta dooinney?

Seeing there be many things that increase vanity, what is man the better?


Son quoi ec ta fys, cre ta mie da dooinney 'sy vea shoh, ooilley laghyn e vea varvaanagh, t'eh dy cheau myr scadoo? son quoi oddys ginsh da dooinney, cre vees ny lurg fo'n ghrian!

For who knoweth what is good for man in this life, all the days of his vain life which he spendeth as a shadow? for who can tell a man what shall be after him under the sun?