The Bible


Eisht dreggyr Job y Chiarn, as dooyrt eh,

Then Job answered the Lord, and said,


Ta fys aym dy vod oo dy chooilley nhee y yannoo, as nagh vod smooinaghtyn erbee ve gyn-yss dhyt.

I know that thou canst do every thing, and that no thought can be withholden from thee.


Quoi eh-hene ta goaill er dy hoilshaghey coyrleyn follit? shen-y-fa ta mee er n'ockley magh shen nagh hoig mee; reddyn yindyssagh erskyn my roshtyn, nagh row fys aym orroo.

Who is he that hideth counsel without knowledge? therefore have I uttered that I understood not; things too wonderful for me, which I knew not.


Eaisht rhym, ta mee guee ort, as loayr-ym: fênyms jeed's, as jean uss y hoilshaghey dooys.

Hear, I beseech thee, and I will speak: I will demand of thee, and declare thou unto me.


Cheayll mee jeed's dy jarroo liorish clashtyn cleayshey; agh nish ta my hooill er dt'akin:

I have heard of thee by the hearing of the ear: but now mine eye seeth thee.


Shen-y-fa ta dwoaie aym orrym pene as ta mee goaill arrys ayns joan as leoïe.

Wherefore I abhor myself, and repent in dust and ashes.


As shen myr ve, erreish da'n Chiarn v'er loayrt ny goan shoh rish Job, dy dooyrt y Chiarn rish Eliphaz yn Temanite, Ta my chorree er ny vrasnaghey dt'oï, as noi dty ghaa charrey: son cha vel shiu er loayrt mychione's shen ny ta cairagh, myr ta my harvaant Job.

And it was so, that after the Lord had spoken these words unto Job, the Lord said to Eliphaz the Temanite, My wrath is kindled against thee, and against thy two friends: for ye have not spoken of me the thing that is right, as my servant Job hath.


Shen-y-fa gow-jee nish hiuish shiaght dew as shiaght reaghyn, as immee-jee gys my harvaant Job, as cheb-jee seose er nyn son hene oural-losht; as nee my harvaant Job padjer y ghoaill er nyn son, son eshyn neem's soiaghey jeh; er-aggle dy dellym riu rere nyn ommijys, ayns wheesh as nagh vel shiu er loayrt my-mychione's shen ny ta cairagh, myr ta my harvaant Job.

Therefore take unto you now seven bullocks and seven rams, and go to my servant Job, and offer up for yourselves a burnt offering; and my servant Job shall pray for you: for him will I accept: lest I deal with you after your folly, in that ye have not spoken of me the thing which is right, like my servant Job.


Myr shen hie Eliphaz yn Temanite, as Bildad yn Shuhite as Zophar yn Naamathite, as ren ad ny va'n Chiarn er harey: ren y Chiarn myrgeddin soiaghey jeh Job.

So Eliphaz the Temanite and Bildad the Shuhite and Zophar the Naamathite went, and did according as the Lord commanded them: the Lord also accepted Job.


As ren y Chiarn cappeeys Yob y hyndaa, tra ghow eh padjer son e chaarjyn: myrgeddin hug y Chiarn da Job ghaa wheesh as v'echey roïe.

And the Lord turned the captivity of Job, when he prayed for his friends: also the Lord gave Job twice as much as he had before.


Eisht haink huggey ooilley e vraaraghyn, as ooilley e hayraghyn, as ooilley e ainjyssee, as ghow ad gien marish ayns e hie; as ghow ad accan jeh, as ren ad eh y gherjaghey son ooilley ny seaghyn va'n Chiarn er choyrt er: hug ad dy chooilley ghooinney da myrgeddin peesh dy argid, as fainey-cleaysh dy airh.

Then came there unto him all his brethren, and all his sisters, and all they that had been of his acquaintance before, and did eat bread with him in his house: and they bemoaned him, and comforted him over all the evil that the Lord had brought upon him: every man also gave him a piece of money, and every one an earring of gold.


Myr shoh vannee'n Chiarn jerrey bea Yob ny smoo na'n toshiaght: son v'echey kiare thousaneyn jeig keyrragh, as shey thousane camel, as thousane whing dy ghew, as thousane assyl bwoirryn.

So the Lord blessed the latter end of Job more than his beginning: for he had fourteen thousand sheep, and six thousand camels, and a thousand yoke of oxen, and a thousand she asses.


V'echey myrgeddin shiaght mec, as three inneenyn.

He had also seven sons and three daughters.


As denmys eh ennym yn inneen shinney, Jemima; as yn nah unnane, Kezia; as ennym y trass, Keren-happuch.

And he called the name of the first, Jemima; and the name of the second, Kezia; and the name of the third, Kerenhappuch.


As ayns ooilley'n cheer cha row mraane erbee ry-akin cha aalin as inneenyn Yob: as hug nyn ayr daue eiraght mastey nyn mraaraghyn.

And in all the land were no women found so fair as the daughters of Job: and their father gave them inheritance among their brethren.


Ny lurg shoh va Job bio shiaght-feed bleïn, as honnick eh e vec, as cloan e chlienney, eer kiare sheelogheyn.

After this lived Job an hundred and forty years, and saw his sons, and his sons' sons, even four generations.


Myr shen hooar Job baase ayns shenn eash vie, as lane dy laghyn.

So Job died, being old and full of days.